Кері қайту

Пациенттерге арналған ескертпе: C және B гепатиттері

C гепатиті вирусы (қысқартылған атауы - HCV) ағзаға енген кезде иммундық жүйе ағзаға C гепатиті вирусын жеңу үшін қанды ағза бойынша тарататын арнайы ақуыздар түзеді. Олар антиденелер деп аталады. Егер сізде HCV антиденелері анықталса, онда сіздің HCV-мен байланысыңыз болды деп бағамдалады. Бірақ бұл C гепатиті сізде белсенді кезеңде дегенді білдірмейді. Кейбір адамдардың иммундық жүйесі (10-нан 2-3 адам) вирустан өздігінен құтыла алады, бірақ қалған 7-8 адамның ағзалары вирусты жеңе алмайды.

C гепатиті вирусымен болған байланысты диагностикалауда пайдаланылатын тестілердің екі түрі бар - ИФТ (иммундық ферменттік талдау) және ЭХЛ (электрохемилюминисцентті талдау). Сонымен қатар ИФТ сезімталдығы мен спецификалылығы шамамен 90% құрайды, ал ЭХЛ – шамамен 98%, сондықтан аса сирек жағдайларда жалған оң және жалған теріс нәтижелер мүмкін.

C гепатиті вирусының болуы мен белсенділігін анықтау үшін сізге қосымша тиісті тестілерді орындау қажет.

Есте сақтау маңызды:

· Сізде C гепатиті вирусымен байланыс болған болса да, сіздің ағзаңыз вирустан өздігінен құтылуы мүмкін. Сондықтан қосымша тестілер орындау маңызды.

· Антиденелерге тапсырған тестіңіз оң нәтиже берсе де және белсенді C гепатиті қосымша тестілермен расталған жағдайда, уайымдамауға тырысыңыз. Әдетте вирустың сіздің бауырыңызды зақымдауына 10 жылдан 40 жылға дейін қажет. Сонымен бірге бауырыңыздың сау болып қалуы үшін істеуге болатын қаншама мүмкіндіктер бар.

· Сіздің дәрігеріңіз ғана сіздің жеке тестілеу нәтижелеріңізге түсіндірме бере және клиникалық диагноз қоя алады.

Вирусыңыздың белсенділігін анықтау мақсатымен, дәрігеріңіз толық тексеру мақсатында сіздің ағзаңыздың ішінде не болып жатқанын дәл білу үшін бірнеше қосымша қан талдауларын тағайындайды. Бұл талдаулар ПТР деп аталады - қанда бар C гепатиті вирусының генетикалық материалын анықтауға көмектесетін полимеразды тізбекті реакция. Талдаулардың бірі сізде вирустың бар-жоқтығына жауап береді. Басқасы вирустың генотипі қандай екенін анықтауға мүмкіндік береді (HCV бірнеше генотипі бар). Тағы бір талдау вирустық жүктемені - сізде C гепатиті вирусы қаншалықты көп және бұл вирустың қаншалықты белсенді екенін анықтайды.

Сізде C гепатиті вирусы болса, ол тек бауырдың жасушасында қалмайды, сонымен қатар ол сіздің қаныңызда да табылуы мүмкін. HCV өте белсенді және өзінің көшірмелерін көп өндіреді. Вирустық жүктемеге талдау - бұл сізде қанша HCV бар екенін өлшеудің жалғыз тәсілі.

Вирустық жүктемеге талдау бірнеше себеп бойынша өте маңызды:

Бірінші: Вирустық жүктемеге талдау сізде вирус бар екендігін немесе сіздің одан арылғаныңызды көрсетеді.

Екінші: Егер сіз жүкті болсаңыз балаңызға вирусты жұқтыру қаупі өте төмен, бірақ егер сіз жоғары вирустық жүктемесі бар жүкті әйел болсаңыз, балаңызға вирусты жұқтыру қаупі бірнеше есе жоғары болады.

Үшінші: Егер сіз интерферонмен терапия өтуге шешім қабылдасаңыз, вирустық жүктемеге талдау дәрігерге терапияның әсері бар-жоқтығын және оны қаншалықты жалғастыру керектігін білуге көмектеседі.

ЕСІҢІЗДЕ САҚТАҢЫЗ: Әрқашан талдауларыңызды бір зертханада жасаңыз. Бұл алынған нәтижелерді салыстырғанда оларды дұрыс бағалауға мүмкіндік береді.

Генотиптеу деген не?

C гепатиті вирусының (қысқаша HCV) бірнеше түрі бар. Іс жүзінде HCV-дің алты әртүрлі түрі бар. Бұл түрлер генотиптер деп аталады және 1-ден 6-ға дейін нөмірленеді. Кейбір генотиптер әрі қарай қосалқы түр деп аталатын түрлерге бөлінеді (мысалы, 1a және 1b).

Сізді емдеуші дәрігерге сіздің генотипіңізді білу өте маңызды, өйткені әртүрлі генотипі бар әртүрлі вирустар әртүрлі емделеді (терапияға жауап береді). Мысалы, 2-ші немесе 3-ші генотипті емдеуге қарағанда, 1-ші генотипті емдеу біраз қиындық тудырады. Және 1-ші типті HCV терапиясы 2 немесе 3 генотиптері терапиясында қолданылатын дәрілік заттар мөлшерінен өзгеше дәрілік заттар мөлшерін талап етеді.

Сізде нақты бір генотиптің болуы сіздің қатты немесе азырақ ауырғаныңызды білдірмейді. Бірақ кейбір генотиптер бауырдың семіздік сияқты нақты бір күйлерімен байланысты болуы мүмкін (мысалы, 3-ші генотип).

Вирустың қандай генотипке жататындығына қарамастан, көп адамдарда C гепатиті қандай да бір симптомдар түрінде көрініс таппайтынын есте сақтау қажет.

Вирустың генотипін білу бірнеше себеп бойынша маңызды болып табылады:

Біріншіден: Егер сіз терапияға баратын болсаңыз, генотип бойынша тест сіздің вирустан құтылудағы мүмкіндіктеріңізді болжауға мүмкіндік береді.

Екіншіден: генотип бойынша тест сіздің дәрігеріңізге дәрілік заттардың қажет мөлшерін және сіздің терапияңыздың ұзақтығын белгілеуге көмектеседі.

ЕСІҢІЗДЕ САҚТАҢЫЗ: Сізде бір немесе басқа генотип вирусының болуы сіздің қатты немесе азырақ ауырғаныңызды білдірмейді.

Маңызды ақпарат:

C гепатитін (HCV) жұқтырған 100 адам бойынша статистика

C гепатиті вирусы (HCV) анықталған 100 адам ішінен шамамен 80 адамда ауру созылмалы формаға өтеді: HCV жұқтырған қалған 20 адам вирустан өздігінен құтылады. Бұл кейбір адамдардың ағзалары HCV-мен табиғи жолмен күресуге қабілетті екендігімен байланысты.

Шамамен 20 адамның жұқтырған созылмалы инфекциясы күшейе түседі және он жыл ішінде ауыр сырқатқа ұласады: Бастапқыда HCV жұқтырған 100 адамның ішінен тек шамамен 20 адамда гепатит ауыр, өмір үшін қауіпті ауруға ұласады (цирроз). Әдетте C гепатиті бар адамның бауыры шынында 40 немесе одан да көп жыл ішінде ауыра бастайды.

C гепатитінің созылмалы инфекциясы бар 2-3 адамда бауырдың қатерлі ісігі дамиды: C гепатиті вирусын жұқтырғаны анықталған бастапқы 100 адамның ішінен тек 2-3 адам ғана бауыр қатерлі ісігіне шалдығады. Бұл тек цирроз бауырды айтарлықтай зақымдағаннан кейін болады.

B гепатиті

B гепатитін диагностикалауға арналған әртүрлі қан талдаулары бар. Жалпы тест немесе зерттеулер сериясын орындауға болады. Төменде негізгі тестілердің кейбіреуі және олардың түсіндірмелері келтірілген.

B гепатитін анықтау бойынша негізгі тест Үстіртін антиген (HBsAg, HBs антигені, HBs Ag, австралиялық антиген). Ол B гепатиті вирусының үстіртін ақуызы болып табылады және жіті немесе созылмалы гепатит кезінде, сонымен қатар B гепатиті вирусын тасымалдау кезінде қанда анықталуы мүмкін. HBsAg анықтауға арналған тестілердің екі түрі бар - ИФТ (иммундық ферменттік талдау) және ЭХЛ (электрохемилюминисцентті талдау).

Сонымен қатар ИФТ сезімталдығы мен спецификалылығы шамамен 90% құрайды, ал ЭХЛ шамамен 98%, сондықтан аса сирек жағдайларда жалған оң және жалған теріс нәтижелер мүмкін. B гепатиті вирусының болуын растау және белсенділігін анықтау мақсатымен, дәрігеріңіз толық тексеру мақсатында сіздің ағзаңыздың ішінде не болып жатқанын дәл білу үшін бірнеше қосымша қан талдауларын тағайындайды. Бұл талдаулар ПТР деп аталады - қанда бар B гепатиті вирусының генетикалық материалын анықтауға көмектесетін полимеразды тізбекті реакция. Талдаулардың бірі сізде вирустың бар-жоқтығына жауап береді. Басқасы вирустық жүктемені - сізде B гепатиті вирусы қаншалықты көп және бұл вирустың қаншалықты белсенді екенін анықтайды.

Нәтижесі оң ПТР -тест вирустың адамның ағзасында белсенді түрде көбейіп жатқанын және бұндай адам гепатит жұқтыру тұрғысынан потенциалды қауіп төндіретінін білдіреді. Егер адамда вирустық этиологиясы бар созылмалы гепатит, вирустық ДНҚ болса, бұл да сонымен бірге адамға бауырын зақымдаудың жоғары қаупі төніп тұрғанын білдіреді.

Нәтижесі теріс ПТР-тест B гепатиті вирусының қанда жоқтығын немесе оның белсенділігінің аса төмен екенін білдіреді. Маңызды! Сіздің дәрігеріңіз ғана сіздің жеке тестілеу нәтижелеріңізге түсіндірме бере және клиникалық диагноз қоя алады.